पुण्याच्या मैदानावर हर्षित राणा यांच्या नावावर अनोखा विक्रम , ठरला जगातील पहिला खेळाडू

मुंबई : टीम इंडिया आणि इंग्लंडमध्ये शुक्रवारी चौथा टी-२० सामना पुण्यात पार पडला. महाराष्ट्र क्रिकेट असोसिएशनच्या मैदानावर झालेल्या सामन्यामध्ये टीम इंडियाने १५ धावांनी विजय साकार केला. अटीतटीचा वाटणारा सामना टीम इंडियाच्या शिलेदारांनी आपल्या बाजुने झुकवला. इंग्लंड टीमसाठी शिवम दुबे आणि हर्षित राणा हे दोन खेळाडू धोकादायक ठरले. हेल्मेटवर चेंडू लागल्याने त्याच्या जागी शिवमच्या जागी कन्कशन सब्स्टीट्यूट म्हणून आलेल्या हर्षित राणाने तीन विकेट घेत टीम इंडियाच्या विजयात महत्वाची भूमिका बजावली. हर्षित राणाची याआधी टी-२० टीममध्ये निवड झाली होती पण त्याला प्लेइंग ११ मध्ये खेळण्याची संधी मिळाली नव्हती. पुण्यामध्ये पठ्ठ्याने मिळालेल्या संधीचं सोनं केलं त्यासोबतच इतिहास रचला आहे.चौथ्या टी-२० सामन्यामध्ये हर्षित राणाने ४ ओव्हरमध्ये ३३ धावा देत ३ विकेट आपल्या नावावर केल्या. इंग्लंडचा धोकादायक खेळाडू लियाम लिव्हिंगस्टोन याला ९ धावांवर माघारी पाठवलं. तो जर मैदानावर टिकला असला तर टीम इंडियासाठी अडचणीचं ठरलं असतं. तिसऱ्या टी-२० मध्येही लियाम लिव्हिंगस्टोनने आक्रमक खेळी करत टीमला १५० धावांचा टप्पा पार करून दिला होता. मात्र राणाने त्याची विकेट घेत करियरमधील पहिली विकेट नावावर केली. हर्षित राणाने जेकब बेथेल ६ धावा आणि जेमी ओव्हरटन १९ धावांवर आऊट करत तीन विकेट घेतल्या.

हर्षित राणा हा कन्कशन सब्स्टीट्यूट म्हणून टी-२० क्रिकेटमध्ये डेब्यू करणारा जगातील पहिला खेळाडू ठरला आहे. याआधी वन डे आणि कसोटीक्रिकेटमध्ये अनेक खेळाडूंनी आपला असा डेब्यू केला आहे पण टी-२० क्रिकेटमध्ये राणा हा पहिलाच खेळाडू ठरलाय. हर्षित राणा हा टीम इंडियाचा भविष्यातील स्टार खेळाडू आहे. आता झालेल्या बॉर्डर-गावसकर मालिकेतही त्याने चमकदार कामगिरी केली होती. गौतम गंभीरही राणाला पाठिंबा देत असल्याने त्याचाही आत्मविश्वास वाढला आहे.

दरम्यान, चौथ्या टी-२० सामन्यामध्ये टीम इंडियाने पहिल्यांदा बॅटींग करताना १८१-९ धावा केल्या होत्या. त्यानंतर या धावांचा पाठलाग करण्यासाठी उतरणारा इंग्लंड संघ १६६ वर ऑल आऊट झाला. या विजयासह टीम इंडियाने मालिका ३-१ ने खिशात घातली आहे. आता पाचवा सामना मुंबईतील वानखेडे मैदानावर होणार आहे.