मुंबईची हवा अत्यंत चिंताजनक ; मुंबईत ठिकठिकाणी अंशत: ढगाळ वातावरण ...

मुंबई : मुंबईमध्ये सोमवारी कुलाबा येथे २२, तर सांताक्रूझ येथे २०.४ अंश सेल्सिअस किमान तापमान नोंदवण्यात आले. दोन्ही केंद्रांवर सरासरीपेक्षा किमान तापमान अनुक्रमे १.६ अंशांनी आणि २.४ अंशांनी अधिक होते. मुंबईच्या किमान तापमानाचा पारा आठवडाअखेरपर्यंत चढाच असण्याची शक्यता आहे. या तुलनेत ढगाळ वातावरणामुळे कमाल तापमानामध्ये मात्र सरासरीच्या तुलनेत मोठा फरक दिसून आला. कुलाबा येथे २९, तर सांताक्रूझ येथे २८.७ अंश सेल्सिअस कमाल तापमान नोंदले गेले. ते सरासरीपेक्षा २.७ आणि ३.४ अंशांनी कमी होते. रविवारच्या तुलनेत कुलाब्याचे तापमान १.४ अंशांनी, तर सांताक्रूझ येथील तापमान १.५ अंशांनी कमी झाले. मंगळवारीही कमाल तापमान सरासरीच्या आसापसा असण्याचा अंदाज आहे. त्यानंतर बुधवारपासून कमाल आणि किमान तापमान चढू शकते, तसेच या काळात आभाळही अंशतः ढगाळ असेल.या आठवड्यात गारपीट, पाऊस आणि मग पुन्हा थंडी असा अनुभव राज्यभरात येऊ शकतो, असे निवृत्त हवामान अधिकारी माणिकराव खुळे यांनी सांगितले. २४ डिसेंबरला काही प्रमाणात बोचरे वारेही अनुभवायला येऊ शकतात. त्यानंतर २५ आणि २६ डिसेंबरला थंडी कमी होऊन संपूर्ण राज्यात ऊबदारपणा जाणवेल, तर गुरुवार ते शनिवार २६ ते २८ डिसेंबरदरम्यानच्या तीन दिवसांत ढगाळ वातावरण राहून तुरळक ठिकाणी गडगडाटीसह किरकोळ पावसाची शक्यता आहे, असेही ते म्हणाले.

विशेषतः नंदुरबार, धुळे, जळगाव, मालेगाव, नाशिक, नगर, पुणे, सातारा, कोल्हापूर, सोलापूर, छत्रपती संभाजीनगर, अकोला, अमरावती, नागपूर, वाशिम, शेगाव, नागपूर, गोंदिया, चंद्रपूर, नांदेड, परभणी जिल्ह्यात व लगतच्या परिसरात पावसाची शक्यता अधिक आहे.