पुणे विमानतळावर मोठ्या आकारांच्या विमानासाठी केंद्रीय मंत्री मुरलीधर मोहोळ यांचा मोठा निर्णय !!

पुणे : पुणे विमानतळावर Pune Airport आंतरराष्ट्रीय विमानांची संख्या वाढावी आणि मोठ्या आकाराच्या विमानांना ये-जा करता यावी, यासाठी आवश्यक असणाऱ्या धावपट्टी विस्तारीकरणाचे काम ‘फास्ट ट्रॅक’वर करण्याचा आदेश केंद्रीय विमान वाहतूक राज्यमंत्री मुरलीधर मोहोळ Minister Murlidhar Mohol यांनी अधिकाऱ्यांना दिला.

पुणे आंतरराष्ट्रीय विमानतळाच्या धावपट्टीच्या विस्तारीकरणाला परवानगी मिळाली आहे. त्यानंतर विस्तारीकरणासाठी आवश्यक असणारे भूसंपादन, लोहगावचा पर्यायी रस्ता करणे आणि इतर तांत्रिक बाबी याबाबत मोहोळ यांनी विविध विभागांच्या वरिष्ठ अधिकाऱ्यांची बैठक घेऊन त्यांना आदेश दिला. या वेळी विभागीय आयुक्त चंद्रकांत पुलकुंडवार, विमानतळाचे संचालक संतोष डोके, महापालिका आयुक्त राजेंद्र भोसले, शहर अभियंता प्रशांत वाघमारे, पथ विभागाचे प्रमुख अनिरुद्ध पावसकर यांच्यासह हवाई दलाचे वरिष्ठ अधिकारी उपस्थित होते.

मोहोळ म्हणाले, ‘पुणे विमानतळाच्या धावपट्टीचे विस्तारीकरण करण्यात येणार असून, यासाठी लष्कराची आणि खासगी जागा प्रत्यक्षात किती लागणार आहे, याबाबत सविस्तर चर्चा केली. हवाई दलाची विमानतळासाठी आवश्यक असणारी जागा ही विमानतळ प्राधिकरणाला मिळावी. या संदर्भातही चर्चा होऊन या मागणीचा प्रस्ताव सैन्य दलाच्या मुख्यालयाकडे पाठवण्याबाबत निर्णय झाला आहे. हवाई दलाच्या या जागेत विमानतळाच्या व्यवस्थापनासंदर्भात यंत्रणा उभी करणे शक्य होणार आहे. या बदल्यात विमानतळ प्राधिकरणाकडून हवाई दलाला पर्यायी जागा देण्यात येणार असून, याबाबतच्या आस्थापनेचा खर्च विमानतळ प्राधिकरणाकडून केला जाणार आहे.’

पुणे विमानतळाच्या धावपट्टीचा विस्तार वेगाने होणे आवश्यक आहे. यासाठी बैठक घेऊन ही प्रक्रिया 'फास्ट ट्रॅक'ने करण्याचा आदेश दिला आहे. पुरंदर विमानतळाची प्रक्रिया सुरू झाली असली, तरी पुण्यातून आंतरराष्ट्रीय उड्डाणे वाढणे आवश्यक आहे. म्हणूनच ही सर्व प्रक्रिया वेगाने पूर्ण करण्याचा प्रयत्न आहे. विस्तारासाठीचे भूसंपादन राज्य सरकारकडून वेगाने केले जाईल, असं केंद्रीय नागरी हवाई वाहतूक राज्यमंत्री मुरलीधर मोहोळ यांनी म्हटलं आहे.

धावपट्टी विस्तारीकरणामुळे विश्रांतवाडी ते लोहगाव हा विमानतळालगत असणारा रस्ता बाधित होणार आहे. त्यामुळे त्या रस्त्याला तातडीने पर्यायी मार्ग तयार करावा लागेल. हा नियोजित पर्यायी रस्ता हवाई दलाच्या जागेतून जाणार आहे. या रस्त्याबाबत बैठकीत चर्चा झाली आणि या पर्यायी रस्त्याचा खर्च पुणे महापालिका करील. महापालिका आणि हवाई दल यांबाबत समन्वय ठेवणार असून, वेगाने ही प्रक्रिया पूर्ण करण्याचा प्रयत्न आहे, अशी माहिती मोहोळ यांनी दिली.