अमेरिकेचा चीनला मोठा धक्का! तब्बल १०४ टक्के इतके प्रचंड आयातशुल्क आकारण्याचा निर्णय !!

न्यूयॉर्क : चीनकडून व्यापारयुद्धासाठी Trade war तयार असल्याची धमकी मिळाल्यानंतरही अमेरिकेने मंगळवारी रात्री (भारतीय वेळेनुसार) चीनवर तब्ब्ल १०४ टक्के इतके प्रचंड आयातशुल्क Import Duty आकारण्याचा निर्णय जाहीर केला. या निर्णयाची अंमलबजावणी आज, बुधवारपासून (नऊ एप्रिल) करण्याचेही घोषित केले. त्यामुळे जगातील सर्वांत मोठ्या दोन आर्थिक महासत्तांमध्ये व्यापारयुद्ध भडकण्याची भीती आहे.

‘व्हाइट हाउस’ने नवीन आणि अतिरिक्त आयातशुल्क आकारण्याची धमकी दिल्यानंतर अमेरिका आणि चीन यांच्यातील व्यापारसंघर्ष सोमवारी तीव्र झाला. या पार्श्वभूमीवर चीननेही अमेरिकेच्या दादागिरीला ‘जशास तसे’ उत्तर देण्याची भाषा केली. चीनचा हा आक्रमक पवित्रा पाहून खवळलेल्या अमेरिकेने मंगळवारी चीनवर १०४ टक्के आयातशुल्क लादण्याचे जाहीर केले. या निर्णयाची घोषणा करतानाच अमेरिकेने चीनसोबत सुरू असणारी चर्चेची सर्व दारे बंद करण्याचा निर्णय घेतला असून, आता अन्य देशांसमवेत चर्चा करण्यावर भर देण्यात येणार असल्याचेही स्पष्ट केले.

‘फॉक्स बिझनेस’चे बातमीदार एडवर्ड लॉरेन्स यांच्या माहितीनुसार, ‘व्हाइट हाउस’च्या जनसंपर्क सचिव करिन जीन-पिअर यांनी जाहीर केले, की अमेरिकेला प्रत्युत्तर म्हणून लादलेले वाढीव आयातशुल्क मागे घेण्यास चीनने नकार दिल्यानंतर, मंगळवारी दुपारी (आठ एप्रिल) चिनी वस्तूंवर १०४ टक्के आयातशुल्क लागू करण्याचा निर्णय जाहीर करण्यात आला. आजवरच्या या सर्वोच्च आयातशुल्कामुळे अमेरिका आणि चीनमधील व्यापारसंघर्ष शिगेला गेल्याचे पुरते स्पष्ट झाले आहे.

गेल्याच आठवड्यात अमेरिकेचे अध्यक्ष डोनाल्ड ट्रम्प यांनी चिनी वस्तूंवर ५४ टक्के आयातशुल्क लागू केले होते. प्रत्युत्तर म्हणून चीननेही अमेरिकी आयातीवर ३४ टक्के आयातशुल्क लागू केले. ते मागे न घेतल्यास कठोर कारवाईचा इशारा अमेरिकेने दिला होता. ‘आधीच्या चुकीनंतर आणखी एक चूक’ अशी या निर्णयाची संभावना चीनच्या वाणिज्य मंत्रालयाने केली असून, ‘ही दीर्घकालीन आर्थिक लढाई असेल आणि आम्ही शेवटपर्यंत लढा देऊ,’ असा निर्धारही चीनने केला आहे.

व्यापारयुद्धाचे परिणाम

अधिकृत आकडेवारीनुसार, गेल्या वर्षी अमेरिकेची चीनसोबतची व्यापारी तूट २९५.४ अब्ज डॉलर होती.
चीनने अमेरिकेवर दबाव टाकला, तर आशिया, युरोपीयन युनियननंतर तिसरे प्रमुख व्यापारी केंद्र असलेल्या अमेरिकेच्या चीनच्या निर्यातीवर वाईट परिणाम होईल, असे विश्लेषकांचे म्हणणे आहे.